Шығыс Қазақстан облысында Қазақ онкология және радиология ғылыми-зерттеу институтының онкологиялық қызметінің жай-күйін мониторингілеу мен бағалаудың республикалық тобы стратегиялық  және инвестициялық даму бөлімінің басшысы Алма Жылқайдарованың басқаруымен жұмысын бастады.

Мониторингтік топтың міндеттеріне МСАК деңгейінде онкологиялық қызметтің жұмысына талдау жүргізу, қатерлі ісіктерді ерте диагностикалау жай-күйі, онкологиялық  пациенттің  бағытын  сақтау  және «Жасыл дәлізді» іске асыру кіреді.

ШҚО көпсалалы онкология және хирургия орталығы онкологиялық ауруларды ерте анықтау бойынша үлкен жұмыс жүргізіліп жатқан МСАК ұйымдарымен тығыз жұмыс істейді. Бүгінгі таңда облыс емханаларында 107 тексеру кабинеті жұмыс істейді: 72 әйел, 35 ер адам. МСАК ұйымына алғаш рет жүгінген әрбір пациент тексеру кабинеті арқылы өтеді. Егер пациенттің қатерлі ісігіне күдік болса, «Жасыл дәліз» жүйесіне кіргізеді, бұл тексеру уақытын едәуір қысқартуға, сол арқылы дәл диагнозды  ертерек табуға  мүмкіндік береді.

Қазіргі уақытта Қазақстанда сүт безі қатерлі ісігін, жатыр мойны қатерлі ісігін және колоректальды ісікті  бұрын анықтауға  арналған  үш Ұлттық скринингтік бағдарлама бар. МСАК ұйымдарының халықпен тиімді жұмысының арқасында 2023 жылы скринингтер барысында дәрігерлер қатерлі ісіктердің 144 жағдайын анықтай алды.

ШҚО-да көпсалалы онкология және хирургия орталығында МСАК ұйымдарының мамандарын қатерлі ауруларды ерте диагностикалау және онкологиялық сақтық мәселелері  бойынша  оқыту  үнемі  жүргізіледі.

Сапар аясында мониторингтік топ мүшелері Өскемендегі бірқатар МСАК ұйымдарына барып, тексеру кабинетінде қарауға жататын пациенттің маршрутын ұйымдастырумен танысты, мамандармен әңгімелесті, олардың кәсіби және коммуникациялық дағдыларын талдады, сондай-ақ мамандандырылған медициналық  көмек  көрсету  сапасын  жақсарту  бойынша  ұсыныстар  берді.