Жатыр мойны қатерлі ісігін -жатыр мойны эпителийінде пайда болатын қатерлі ісік. Қазақстанда ауру еліміздің әйел тұрғындарында жетекші онкологиялық патология болып табылады және сүт безі қатерлі ісігінен кейін екінші орында тұр.

ШҚО көпсалалы онкология және хирургия орталығының хирург-онкогинекологы Жандос Жагниевтің айтуынша, дәрігерлер аурудың алдын алуға және ерте анықтауға көп көңіл бөледі. Осының арқасында өткен жылы ШҚО-да жатыр мойны қатерлі ісігін анықтаудың 107 жағдайының 90 пайызында ауруды ерте сатысында анықтауға мүмкіндік туды.

– Бүгінгі таңда ШҚО-да көпсалалы онкология және хирургия орталығында әйелдерге қажетті зерттеулер мен емдеу жүргізу үшін қажетті барлық нәрсе бар, – дейді Жандос Жагниев. – Ультрадыбыстық, КТ, МРТ сияқты диагностикалық әдістер бар. Жатыр мойны обырын емдеу халықаралық стандарттар мен хаттамалар бойынша жүргізіледі. Емдеудің үш дәстүрлі түрі қолданылады: хирургиялық, химиотерапиялық және сәулелік терапия.

ШҚО КОЖХО-тың дәрігерлері үздік шетелдік клиникаларда үнемі білім алып, біліктілігін арттырады. Хирургтар тиімді технологияларға, соның ішінде аз инвазивті технологияларға ие. Жандос Жагниевтің айтуынша, онкогинекология және маммология бөлімінде жасалатын операциялардың 60 пайызы лапароскопия әдісімен жасалады. Бұл жұмсақ, аз инвазивті хирургия. Осы әдістің арқасында асқыну ықтималдығы айтарлықтай төмендейді, сонымен қатар пациенттерді оңалту уақыты азаяды.

– Жатыр мойны обырын ерте анықтау жүз пайыз емдеу мүмкіндігін арттырады. Алайда, біздің міндетіміз – ауруды уақытында анықтап қана қоймай, оның пайда болуына жол бермеу, – деп атап өтті Жандос Жагниев. – Сондықтан біз әрқашан скринингтен өту қажеттілігі туралы айтамыз. Осы жылдың қыркүйек айынан бастап Қазақстанда адам папилломавирусына қарсы вакцинация қолжетімді болады. Халықты вакцинациямен қамту болашақта жатыр мойны қатерлі ісігімен сырқаттанушылықты едәуір қысқартуға мүмкіндік береді.

Дүниежүзілік жатыр мойны қатерлі ісігінің алдын алу және хабардар ету апталығы аясында ШҚО көпсалалы онкология және хирургия орталығында Ашық есік күні өтеді. 27 қаңтарда сағат 09.00 – ден 13.00-ге дейін барлық ниет білдірушілер Онкогинеколог-дәрігерлердің қабылдауына келіп, білікті кеңес ала алады. Өзіңізбен бірге жеке куәлікті алу қажет, учаскелік дәрігердің жолдамасы талап етілмейді.